भोजपुरी इंडस्ट्री के ‘पावर स्टार’ यानी पवन सिंह कब कहाँ का गुल खिलाईहें, ई केहू ना जानत। कबो अपनी निजी जिंदगी त कबो विवाद के चलते सुर्ख़ियों में रहे वाला पवन सिंह ए बेर एगो अइसन धमाका कइले बाड़े कि फैंस गदगद हो गइल बाड़ें। सोशल मीडिया पर उनकर एगो ताजा पोस्ट ‘आग’ लगा रहल बा, जवना में ऊ अपनी अपकमिंग फिल्म ‘डकैत: एक प्रेम कथा’ के लेके बड़हन जानकारी साझा कइले बाड़ें।
साउथ के तड़का अउर ‘डबल पावर’
पवन सिंह अपनी पोस्ट में साफ लिखले बाड़ें कि ए बार मामला कुछ अलग होखे वाला बा। ऊ लिखलें— “भोजपुरी का फ्लेवर, साउथ का स्वैग… इस बार धमाका होगा डबल पावर के साथ!” यानी साफ़ बा कि पवन सिंह अब साउथ के फिल्म इंडस्ट्री के अंदाज़ में भोजपुरी सिनेमा के जलवा बिखेरे खातिर कमर कस लिहले बाड़ें। बता दीं कि ए फिल्म में अदिवी शेष अउर मृणाल ठाकुर लीड रोल में नजर अइहें, जबकि पवन सिंह अपनी जादुई आवाज़ से ए फिल्म में जान फूँकिहें।
काहे टल गइल रिलीज के तारीख?
पहिले ई फिल्म 19 मार्च के रिलीज होखे वाली रहे, बाकिर बॉक्स ऑफिस के गणित देखत मेकर्स आपन मन बदल लिहले बाड़ें। दरअसल, पवन कल्याण के फिल्म ‘उस्ताद भगत सिंह’ अउर रणवीर सिंह के ‘धुरंधर 2’ के बंपर कमाई के देखत ‘डकैत’ के टीम कवनो रिस्क ना लेवे के चाहत रहे। एही से अब ई फिल्म 19 मार्च के जगह 10 अप्रैल के सिनेमाघरों में दस्तक दी।
गोरखपुर में मची ‘टची बडी’ के शोर
खाली फिल्म के खबर ना बा, पवन सिंह अपनी नया गाना ‘टची बडी’ के लेके भी बवाल मचावे वाले बाड़ें। ‘टची बडी ग्रैंड’ सॉन्ग इवेंट के जानकारी देत ऊ बतवलें कि ई धमाकेदार इवेंट 28 मार्च के साँझ 6 बजे, गोरखपुर के महंत दिग्विजयनाथ पार्क में आयोजित कइल जाई। गोरखपुर के जनता अउर पवन सिंह के फैंस ए खबर के सुनला के बाद से ही एक्साइटमेंट में बाड़ें कि कब ऊ घड़ी आई अउर कब पावर स्टार के नया गाना गूँजी।
फैंस भइले खुशी से लबालब
पवन सिंह के ई पोस्ट आवते ही कमेंट सेक्शन में ‘पावर स्टार’ के जय-जयकार शुरू हो गइल बा। लोगन के कहनाम बा कि पवन सिंह जब भी साउथ के तर्ज पर कुछ नया लेके आवेलें, त ऊ बॉक्स ऑफिस पर झंडा गाड़ देवेला। ‘डकैत: एक प्रेम कथा’ के नामे से ही लगत बा कि ए बार एक्शन अउर रोमांस के जबरदस्त कॉकटेल मिले वाला बा।
