चंपत राय अउर अनिल मिश्रा के इस्तीफ़ा मंजूर, कृष्ण मोहन बनलन अंतरिम महामंत्री

अयोध्या के राम मंदिर में चढ़ावा चोरी अउर हेराफेरी के मामला गर्माए के बाद सोमवार के पहिली बेर श्रीराम जन्मभूमि तीर्थ क्षेत्र ट्रस्ट के बड़हन बैठक भइल। ट्रस्ट के महामंत्री चंपत राय अउर सदस्य अनिल मिश्रा के इस्तीफा के स्वीकार क लिहल गइल बा।

जरूर पढ़ें

बांकीपुर उपचुनाव में उतरिहें प्रशांत किशोर, का बा पीके के असल रणनीति?

राम मंदिर ट्रस्ट के नया महामंत्री कृष्ण मोहन के हवें?

ट्रस्ट के कोषाध्यक्ष गोविंद देव गिरी मीडिया के सामने आके इ बात के साफ़ कइलन। ऊ बतवलन कि चंपत राय के जगह अब कृष्ण मोहन के अंतरिम महामंत्री बनावल गइल बा, अउर जब तक ले कवनो नया महामंत्री ना चुन लिहल जाव, तब तक ऊहे इ ज़िम्मेदारी सम्हारिहें। एकरा साथे-साथे खास अधिकारियन के नियुक्ति खातिर एगो विशेष कमेटी बनावल गइल बा अउर अब अगिला बड़हन बैठक 22 जुलाई के होखी। कोषाध्यक्ष के उम्मीद बा कि तब तक एसआईटी (SIT) के फाइनल रिपोर्ट भी सामने आ जाई।

चंपत राय के इस्तीफा के कहानी पिछला महीना से ही चलत रहे। जब चढ़ावा चोरी अउर गबन के आरोप लागल, त 26 जून से ही उनकरा हटे के चर्चा रहे, जवना के बाद 27 जून के पत्र जारी क के ट्रस्ट जानकारी देले रहे। गोविंद देव गिरी कहलन कि अपराधियन के सख्त सजा मिली, उनकरा कोर्ट प पूरा भरोसा बा। ऊ हिंदू समाज से अपील कइलन कि अफ़वाहन प ध्यान मत दीं। अगर केहू के कवनो सामान हराए के शंका बा, त ऊ सीधा राम मंदिर के दफ्तर में आके पता कर सकेला। ट्रस्ट के लगे पूरा 2800 सामानन के पक्का रजिस्टर बा, जवना के कवनो भी जांच कइल जा सकेला।

एह पूरे बवाल प होखत राजनीति प भी कोषाध्यक्ष खुल के बोललन। ऊ कहलन कि “पूरा देश में जवना तरे के हल्ला मचावल जा रहा बा, ओकरा पीछे के नीयत साफ़ नइखे। जवन लोग आज राम भक्ति के पाठ पढ़ावत बाड़ें, उहे लोग कभी रामभक्तन प गोली चलवले रहन। आज राम भक्ति के विरोध करे वाला लोगन के सीना में जवन दिखावटी दरद जागल बा, ओकर असली मकसद हिंदुओं के आपस में बांटल बा।”

गिरी जी भावुक हो के कहलन कि “इ मंदिर कतनो संघर्ष अउर लोगन के प्राण, परिवार अउर करियर के कुर्बानी के बाद बनल बा। चढ़ावा चोरी के इ घटना गिनती करे वाला समय में भइल बा, जवना से हमनी के भारी दुख बा। चोरी छोट रहे या बड़, इ बात बाद के ह, बाकी जवना तरे के माहौल बनावल गइल बा, ऊ चिंता के विषय बा।” चंपत राय के इस्तीफा प ऊ कहलन कि “अइसन माहौल बन गइल रहे कि चंपत राय अउर न्यासी अनिल मिश्रा वेदना (दरद) में रहन।

चंपत राय जी के कहनाम रहे कि जब तक पूरा न्याय ना हो जाव अउर असली मुजरिम ना पकड़ा जास, तब तक उनकर पद प रहल ठीक नइखे। हालांकि, इस्तीफा मंजूर कइल हमनी के हाथ में ना रहे। संस्थापक ट्रस्टी के परासरन जी बतवलन कि नियम के मुताबिक इस्तीफा देते ही ऊ खुद-ब-खुद मंजूर मानल जाला। चंपत राय जी सुरुए से मंदिर निर्माण के काम कइले बाड़ें, हमनी उनकरा त्याग अउर उदारता के सम्मान करत ओकरा के स्वीकार क लेनी।” ऊ बतवलन कि सभ सामान सुरक्षित बा अउर ऊ लोग खुद रजिस्टर लेके आइल बाड़ें।

नया अंतरिम महामंत्री कृष्ण मोहन साफ कहलन कि उनकर पहिली प्राथमिकता इ बा कि दोषी लोगन के कड़ा सजा मिले। एह घटना से रामभक्तन के बहुते कष्ट भइल बा। ऊ मानलन कि प्रबंधन अउर संचालन में कहीं ना कहीं कमी रह गइल रहे, जवना के ऊ ठीक करिहें अउर ट्रस्ट के धूमिल भइल छवि अउर अविश्वास के माहौल के बदल के दोबारा साख कायम करिहें।

बैठक से ठीक पहिले, ट्रस्ट के अध्यक्ष महंत नृत्यगोपाल दास भी एगो चिट्ठी जारी कइले रहन। ऊ लिखलन कि चोरी से ऊ आहत बाड़ें, बाकी उनकरा देश के प्रधानमंत्री नरेंद्र मोदी अउर यूपी के मुख्यमंत्री योगी आदित्यनाथ प पूरा भरोसा बा, अउर एह मुद्दा प कवनो राजनीति ना होखे के चाहीं।

अगर पुलिसिया कार्रवाई के बात कइल जाव, त एसआईटी (SIT) अब तक एह चढ़ावा चोरी के मामला में 8 आरोपी लोगन के दबोच चुकल बिया। सोमवार 29 जून के 3 दिन के रिमांड खतम भइला के बाद दोबारा 14 दिन के न्यायिक हिरासत में जेल भेज दिहल गइल।

इ पूरा मामला पिछला महीना के शुरुआत में खुलल रहे, जब मीडिया रिपोर्ट्स में दावा कइल गइल कि दानपात्र के कैश अउर कीमती सामान गायब बा। एकरा बाद अयोध्या के लोकल नेता आपस में भिड़ गइलन। समाजवादी पार्टी के मुखिया अखिलेश यादव भी ‘X’ (पहले ट्विटर) प पोस्ट क के दावा कइले रहन कि राम मंदिर के चढ़ावा के करोड़ों रुपइया गायब बा। मामला जब तूल पकड़लस, त योगी सरकार तुरंत एसआईटी जांच बैठा दिहलस। एसआईटी गठन के 10 दिन के भीतर 23 जून के अपनी शुरुआती रिपोर्ट सरकार के सउंप देले रहे, जवना के बाद 25 जून के एफ़आईआर दर्ज क के 8 लोगन के गिरफ्तार क लिहल गइल.