बांकीपुर सीट पर पीके के चुनाव लड़े के फइसला कई मायने में चौंकावे वाला बा। ई सीट भाजपा के सबसे सुरक्षित (सेफ जोन) मानल जाला। इहाँ से नितिन नवीन लगातार पाँच बेर विधायक रहल बाड़ें, अउर उनुका से पहिले उनुकर बाबूजी इहाँ से जीतत रहलें।
जरूर पढ़ें
राम मंदिर ट्रस्ट के नया महामंत्री कृष्ण मोहन के हवें?
चंपत राय अउर अनिल मिश्रा के इस्तीफ़ा मंजूर, कृष्ण मोहन बनलन अंतरिम महामंत्री
पिछला चुनाव में एह सीट से जवन दस गो उमीदवार खड़ा भइल रहलें, ऊ सब सामान्य (जनरल) वर्ग से आवत रहलें। ई एह बात के साफ इशारा बा कि बांकीपुर में कवना वर्ग के वोटर लोग के जादे पकड़ अउर वर्चस्व बा।
का बा पीके के मास्टरप्लान अउर सियासी समीकरण?
नीतीश कुमार के सत्ता से विदाई अउर सम्राट चौधरी के सीएम बनला के बाद, पीके एह उपचुनाव के एगो मौका निहन देख रहल बाड़ें। उहाँ के बांकीपुर के जनता से अपील करत निहोरा कइलें, “मोदी जी रउआ लगे बतियावे ना अइहें। आजुओ ना, पांच साल बाद भी ना। मोदी जी के ई कइसे पता चली कि सम्राट चौधरी के मुख्यमंत्री बनवला से रउआ लोग खुश नइखीं? बांकीपुर से भाजपा के हराईं, उनुका लगे अपने-आप खबर पहुँच जाई कि जेकरा के उहाँ के चुनले बाड़ें, ओकरा से रउआ लोग सहमत नइखीं।”
एकर संगे-संगे हाल में भोजपुर में भइल भरत भूषण तिवारी के एनकाउंटर (7 जून के पुलिस एनकाउंटर, जेकरा बाद इलाज में मौत हो गइल) जइसन मुद्दा पर भी प्रशांत किशोर काफी मुखर लउकल बाड़ें, जेकरा से उहाँ के सरकार के घेरे के पूरा तइयारी में बाड़ें।
‘शहरी उदासी’ में स्कोप तलाश रहल बा जन सुराज
बांकीपुर शहरी सीट ह अउर इहाँ वोटिंग प्रतिशत अक्सरहा कम रहेला। 2025 के चुनाव में भी इहाँ बस 41% के आसपास वोट पड़ल रहे। गणित समझीं त भाजपा के कुल वोटर के करीब 25% वोट मिलल अउर नितिन नवीन 52 हजार से जादे वोट के अंतर से जीतल रहलें। एकर सीधा मतलब ई बा कि 75% वोटर लोग भाजपा के वोट ना देले रहे। पीके एही वोट बैंक के आपन हथियार बनावे के ताक में बाड़ें।
राजनीतिक जानकार लोग के माने के बा कि अगर पीके इहाँ से जीत गइलें, त ई उनुका खातिर एगो बहुत बड़ बात होखी। अउर अगर हार भी गइलें, त अरविंद केजरीवाल के 2014 के बनारस चुनाव (नरेंद्र मोदी के खिलाफ) नियन सुर्खियन में त बनले रहिहें। भाजपा खातिर इहाँ जीतल मात्र सीट बचावल नइखे, बलुक अपने राष्ट्रीय अध्यक्ष के जीत के अंतर के साख बचावल भी बा।
2025 के चुनाव के खराब रिजल्ट के बाद पीके के दांव
रउआ सभे के इयाद होखी कि 2025 के विधानसभा चुनाव में पीके राघोपुर से तेजस्वी यादव के खिलाफ लड़े के भनक देले रहलें, बाकिर ऐन मउका पर चुनाव लड़े से मना कर देलें। उहाँ के तर्क रहे कि पार्टी के दोसर सीट पर धियान देबे के बा। बाकिर ओकर नतीजा ई भइल कि जन सुराज पार्टी के 238 में से 236 उमीदवार के जमानत जब्त हो गइल अउर कुल 3.4% वोट मिलल।
ओहिजे 2025 में भाजपा 89, जदयू 85, राजद 25 अउर एलजेपी(आर) 19 सीट जितले रहे। जन सुराज के उम्मीदवार वंदना कुमारी बांकीपुर से 5% से भी कम वोट पा के तीसरा नंबर पर रहली।
आमतौर पर उपचुनाव में जनता के बहुत दिलचस्पी ना रहेला, बाकिर प्रशांत किशोर के बांकीपुर के चुनावी रण में उतरे से ई मुकाबला हाई-प्रोफाइल हो गइल बा अउर पूरा बिहार के नजर अब एह सीट पर टिक गइल बा।