जेकरा ख़ातिर सौ गो अधापन होला,
उहो कहाँ आख़िर में आपन होला।
उहे लुट जाला घर-बाहर दूनू जगे,
जेकरा में ज़ियादा सीधापन होला।

जब गरज पड़ल त बुझनी ई बात,
मदद से ज़ियादा त विज्ञापन होला।
जे जिनगी लगा देल अपनन के ख़ातिर,
बड़ा ही बुरा ओकर समापन होला।

'नूरैन' काटेला जे भी दिन बनवास के,
एक दिन हिस्सा में ओकरे सिंहासन होला.

फेरू आराम करे ना अइबऽ
तनी से तू सम्हरे ना अइबऽ
बताव ना पापा काहे ए साल
ईद मे अबकी घरे ना अइबऽ

गोदी मे तोहरा लोटइतीं खूब
साथे भरपेट खइतीं खूब
स्कूल के नवका कविता पढ़ी
पापा तोहके सुनइतीं खूब

बड़ी सवख बा हमरो पापा
कान्ह प अपना धरे ना अइबऽ
बताव ना पापा काहे ए साल
ईद मे अबकी घरे ना अइबऽ

चुहकत कुहकत चिरई के
आइल दिन अब भिरई के
सुनले बानी हमहुँ कहीं
मास चईत ह पिरई के

कटनी बन्हनी आ दंउरी मे
बाबा के मदद करे ना अइबऽ
बताव ना पापा काहे ए साल
ईद मे अबकी घरे ना अइबऽ

​का कही ए भाई आज, कईसे हम ईद मनवनी ह,
ईदगाह में सैकड़ों भीड़ रहल ह, बाकिर खुद के तनहा पवनी ह।
​मने-मने सकुचात रहनी ह, कईसे हाथ बढ़ाईं,
कैसे करीं मुसाफ़ा हम, केकरा से हाथ मिलाईं।

​ईद परदेसी के अइसहीं होला, मन के हम समझवनी ह,
का कही ए भाई आज, कईसे हम ईद मनवनी ह।
​फिर अउते ईदगाह से हम, माई के फोन लगवनी ह,
दुआ-सलाम भईल ह, सब ठीके बाटे बतवनी ह।

​क बजे नमाज भईल ह, कब पढ़ के अईला ह?
पूछली ह माई—"ए बाबू! का बनवला ह, का खइला ह?"
​कवनो बात के कमी नईखे, चिंता मत कर माई रे,
तोहरे हाथ के स्वाद सेवई में, इहवाँ कहाँ भेटाई रे!

​आँख भईल ह नम माई के, कईसहूँ ओके समझवनी ह,
का कही ए भाई आज, कईसे हम ईद मनवनी ह।

गर आपन केहू रूठे तऽ
बेमतलब रिश्ता टूटे तऽ
कईसे सुलझाई?
केहू यार बताई?

सब लोग ही अंधी दौड़ में बा
का आपन अउर पराया काऽ
केहु कहे कि रिश्ता बंधन हऽ
केहु कहे कि रिश्ता माया हऽ

अइसे में कइसे मन में केहु के
अपनापन के बीज उगाई!
केहू यार बताई?
रिश्तन के खींचा - तानी में

बस , उमर बेचारी सरकऽता
एक ओर जमाना के ताना
एक ओर जवानी फरकऽता
मन द्वंद के झूला में झूले

बैरी आपन ही परछाईं!
केहू यार बताई?

असली चेहरा भी दिखाओ तो ज़रा तुम
रूह से पर्दा हटाओ तो ज़रा तुम
भूल जाऊँगा सितम सारे पुराने
फिर सितम ढाने को आओ तो ज़रा तुम

बेवफा वो बे-ख़बर हम से हो तो हो
पर ख़बर उसकी सुनाओ तो ज़रा तुम
डर मुझे काँटों से लगता ही नहीं है
इन गुलाबों से बचाओ तो ज़रा तुम

इल्तिजा है चाँद देखें हम ज़मीं पर
अब ये घूँघट को हटाओ तो ज़रा तुम
है शग़फ़ उसको, सुना है शायरी से
ये हुनर हमको सिखाओ तो ज़रा तुम

थक गया मैं तो हकीमों को दिखा कर
इक दवा दिल की बताओ तो ज़रा तुम

बुढ़ापा एक दिन अइबे करी
बचपन गइल, जवानी आइल,
उहो एक दिन जइबे करी,
चाहे कवनो जुगत भिड़ाईं,

बुढ़ापा एक दिन अइबे करी!
केतनो दुध मलिदा खाईं,
काजु किशमिश रोज चबाईं,
खिलल देह खिलले ना रही,

एक दिन इ सूख जइबे करी,
चाहे कवनो जुगत भिड़ाईं,
बुढ़ापा एक दिन अइबे करी!
कवनो पाउडर क्रीम लगाईं,

रोज रोज मेकअप करवाईं,
ढ़ल जाई चेहरा के पानी,
एक दिन इ मुरझइबे करी,
चाहे कवनो जुगत भिड़ाई,

बुढ़ापा एक दिन अइबे करी!
अपने पर इतराइल छोड़ीं,
रुपवा देख धधाइल छोड़ीं
रामसागर कुछ खबर ना लागी,

चाम हऽ ई झुल जइबे करी,
चाहे कवनो जुगत भिड़ाईं,
बुढापा एक दिन अइबे करी!
©️✍️: रामसागर सिंह

सिवान, बिहार
M: 8156077577

भोजपुरिया के सपना के, कब ले बहराई कुची से,
कब ले भोजपुरी बाहरे रही, आठवीं अनुसूची से!
दू लाइन भोजपुरी सुनके, रउआ तऽ अगरा गइनी,
उहों के तऽ पोलियो जइसे, दू बून दवा पिया गइनी!

उहां के तऽ डोज पियवनी, खाली वोट के रुचि से,
कब ले भोजपुरी बाहरे रही, आठवीं अनुसूची से!
जंतर मंतर बइठ के रउआ, केतना जोर लगाइब जी,
जब ले संघवा सांसद मंत्री, नेताजी के ना पाइब जी,

वोट के जब हरियरी देखिहें, नेताजी अइहें खुशी से,
कब ले भोजपुरी बाहरे रही, आठवीं अनुसूची से!
भाग्य के छोट भोजपुरी बाटे, नेता लोग मुंह चोर बा,
भोजपुरी के आवाज ना बने, पीछे खींचले गोड़ बा!

सवांस नइखे लड़हु वाला के, आपस के कानाफुसी से
कब ले भोजपुरी बाहरे रही, आठवीं अनुसूची से!
भोजपुरी से न्याय के खातिर, आईं अब हठयोगी बनीं,
आईं अब भोजपुरी खातिर भोजपुरिया के सहयोगी बनीं,

रामसागर कठिन लड़ाई बाटे लड़ लिहीं मजबूती से,
कब ले भोजपुरी बाहरे रही आठवीं अनुसूची से!
✍🏻: रामसागर सिंह
सिवान, बिहार ( वर्तमान में सुरत, गुजरात )

M : 8156077577

आसमान से हल्का बुंदाबुंदी, चौपाई बयार के संगे पुस के महीना अंतिम चरण में रहे! लगभग दस दिन से सुरुज महाराज कबहूँ कुहासा त कबहूँ बदरी से तोपाइल,धरती पर आपन नजर ना फेरले रहले! हाड़ कंपावे वाला ठंड़ी के असर नवका लोग के भी जेकर खून अभीन गरम बा, रजाई में लुकाये के मजबूर कर देला तऽ सोचीं जे पुरान हो गइल बा ओकर का हाल होई?
नटवर के माई घर के ओसारा में एगो कोना पलास्टिक के चटाई पर बिछावल दोहरा बिछावन पर बइठ के थर थर कांपत रहली! ओढ़े के तऽ उ विदेश से आइल अरबियन कामरा ओढ़ले रहली, बाकिर पुरनिया देह खातिर उहो कामरा साइत कम पड़त रहे! उ मने मन इहे सोंचते रहली कि पलानी, से खपरैल ले, फेरु जब खपरैल से छत वाला मकान भइल तबहुं जिनगी में अइसन ठंढी कबहूँ ना आइल रहे! का जाने इ हमरा उमिर के दोस बा कि सांचो एतना हाड़ कंपावे वाला ठंढी आइल बा!
पहिले के समय में गाँव आजु के जइसन ना रहे! गाँव-गाँव में जाड़ा के दिन में सभका दुअरा पर घुर,आउर बहिन महतारी खातिर आंगन में बोरसी के जरुर बेवस्था रहे! आपन छोटा मोटा काम ओरवाई के सभे घुर चाहे बोरसी के चारो ओर गोलाईं में बइठ के ठंढी भगावे! ओढ़ना के नाम पर पुरान धोती साड़ी के तहिया के, मोटका डोरा से सीयल गुदरी ही ओह समय के रजाई रहे! असली रजाई त केहुवे केहुवे के घरे रहे!
केहु केहु के घरे पिटुआ कामरा(कंबल) भी रहे जवन भेड़िहार भाई लोग भेंड़ी से उन काट के बनावे लोग! ठ़ंढ़ी भगावे खातिर घर के कवनो कोना में जमीन पर बिछल पुअरा पेठारी आउर ओइपर बिछावन के नाम पर कलकतिया जूट के बोरा, जवन कवनो पुरान धोती चाहे लुगा से ढंकाइल रहे! कुस चाहे पेठारी से बनल चटाई भी ठंढी में बिछावना के काम करे! बाकिर जवन भी साधन रहे ओइसे लोग आपन ठंढी जइसे तइसे काट लेव!

अब त गांव पहिले के गांव से बहुत आगे निकल गइल! अब मड़ई, पलानी त खतम होखे के किनारा बा! गांवे गांव बहुते लोग के पक्का मकान, रजवाड़ी गेट, बिजली, पंखा, फ्रीज, हिटर, टी. वी. सब लाग गइल! घर के फर्श पहिले माटी से पलास्तर आउर अब मार्बल, टाइल्स आउर महंगा पत्थर के जुग ले आ गइल!
नटवर भी जब से सउदी कमाये लगले पुरान घर तुड़वा के चकाचक नवका स्टाइल के घर बनवा लिहले! घर में सारा सहुलियत के सामान लाग गइल!
घर में चूना के जगह व्हाइट पुटी आउर सिमेन्ट और ओकरा उपर पसंद के रंग के पेन्ट पोताइल! फर्श पर टाइल्स के जगहा सफेद संगमरमर के पत्थर लागल! कुल मिलाके उनकर घर कवनो शहर के बंगला से कवनो कोना से कम ना रहे! कमी रहे त इ रहे कि ओ घर में माई खातिर कवनो जगहा ना रहे!
गिन गुंथ के ज गो घर बनल रहे नटवर, आउर उनका बेटन के हिसाब से बनल रहे! घर के घरभोज होते ही सभे आपन आपन कोठरी छेंका लिहले! ना नटवर इ सोचले कि माई कहाँ रहीहें ना उनका लरिकन के कवनो आपना इया के कवनो फिकिर रहे!

पुस के ओह ठंड़ी में नटवर के माई के बिछावना बहरी ओसारा में हो गइल! संगमरमर के पत्थर के फर्श पर पलास्टिक के चटाई के उपर एगो दरी नियन मेंही गुदरी बिछा के सउदी से आइल कामरा दे के माई के सुता दियाइल!
जवन संगमरमर के सफेद पत्थर घाम में भी ठंढ़े रहेला उ पुस के ठंढ़ी रात में का रंग देखावत होई? सुतते फर्श आपन रंग देखावे लागल! जइसे तइसे आँख लागल बाकिर अधरतिया के पहिलहीं आँख खुल गइल! नीचे से चटाई गुदरी सब पाला हो गइल रहे! उ सउदी वाला कामरा के बगल वाला भाग करवट ले के नीचे दबवली!
कुछ आराम मिलल बाकिर तनिक देर बाद फेरु उहो पाला लागे लागल! रात भर जइसे तइसे उखी-बिखी में बितल!भोर होते होते फर्श के बिछावन त बिछावन ह सउदी वाला कामरा भी बुझाव की बरफ हो गइल बा! उ उठ के बइठ गइली!
बिछावन पर एगो कोना गुटियाके देह गरम करे के कोशिश में लाग गइली! बाकिर ना उनके देह के दलदली कम होखे ना उनकर दाँत कटकटाइल!

सुबह नटवर जब अंदर से बाहर अइले, माई के दशा देखके फटाफट घर से एगो आउर कामरा लियाके निमन से ओढ़ा दिहले! देह के आराम मिलल! जइसे तइसे दिन बितल, गदबेर हो गइल! नटवर के माई के आपन रात वाला दुरदासा बिसरत ना रहे!
उ आपना बेटा नटवर के बोला के कहली....
"ए बाबु, निचवा बड़ी पाला लागत बा, ना होखे त एह कोनवा तनी पेठारी बिछवा के खटियवा से आड़ कर दिहतऽ! नीचे से हई पत्थरवा पाला लागत बा आउर उपर से सुपुहा मार के इ कामरा पाला कल् देता! "
" का माई? तुहुं अजबे बात करेलु! अतना मँहगा पत्थर फर्श पर पुअरा पेठारी बिछावे के लागल बा! जब पुअरे पेठारी बिछावे के रहीत त इ बनवावला के का फायदा! तनी तुहीं बतावऽ, लाखो रुपिया लगवाके इ पत्थर लगवअले बानी,खटिया खड़ा कर के इहाँ आड़ कइल जाई , जब खटिया एने ओने खिंचाई त एतना महँगा पत्थर खराब ना होई? "

नटवर के माई के तब बुझाइल कि उ केतना कम किमती बाड़ी! नव महिना पेट में ढो के, सगरी दरद पीरा सह के वंश जनमावल जाला! ना जाने कवन कवन सपना मार के लरिकन के पोसल जाता, बाकिर उहे लरिका जवान होके सब निक लिप देत बाड़े सन! बाप महतारी के बुढ़ारी बोझा लागे लागता! नटवर के माई के बुझा गइल कि लरिकाईं में खिंच खिंच के आंचर ओढ़े वाला नटवर खातिर अब उ काम के चीज नइखी रह गइल!
"ना ए बाबु.. हम तो एह से कहनी ह कि पछुआ हलकोरा मारत बा, लागत बा कि लाद में ठंढ़ी मार दी! "
" ना माई! पत्थर पर पुअरा थोड़े बिछी! एगो कामरा अउरी ले लिह, ठंढ़ी ना लागी!
नटवर के माई "ठीक बा" कह के चुप हो गइली! रात के खाना खइला के बाद सभे अपना अपना घर में सुते चल गइल! नटवर के माई के एगो अउरी कामरा दिया गइल! उ तीन तीन गो कामरा ओढ़ के सुत गइली! पछुआ आपना पुरा रंग में रहे! ओढ़ना आउर पछुआ में वर्चस्व के लड़ाई होत रहे! आखिर ओढ़ना पर पछुआ भारी परे लागल! पछुआ अब कामरा के महीन छेदानी से पार होके नटवर के माई के शरीर छेदे लागल! उ उठ के बइठ गइली!

ठंढी छाती में समा गइल रहे! देह काँपे लागल, पेट दलदलाए लागल, दाँत कटकटाये लागल! उ केतने बार कोशिश कइली कि देह ना हिलो, दाँत जनि कटकटाव, बाकिर बार बार के कोशिश नाकाम भइल! उ एक बेरी फेरु से तीनों कामरा देह में लपेट के ओठंग गइली!
पछुआ आउर ओढ़ना के लड़ाई अब ठंढ़ी आउर नटवर के माई के लड़ाई में बदल गइल रहे! ठंढ़ी उनके हिलावे कंपकंपावे के फेर में रहे, उ अपना के ना हिले देवे के लड़ाई लड़त रहली! आखिर धीरे धीरे उ आपन गोड़ लंबा कर के कामरा में गुटिया के सुत गइली!
बिहान होते नटवर घर से बाहर निकलले! देखले के माई आराम से गोड़ लंबा कर के सुतल बाड़ी! नटवर ओसारा से बाहर निकल के गांव के गुमटी पर कुछ लेवे चल गइले! लगभग एक घंटा बाद उ घरे पहुंचले त माई ओसहीं टंगरी लंबा कर के सुतल रहली! मने मन उ सोंचले कि माई तीन गो कामरा पाके आज आराम से सुतल बिया! उ आवाज दिहले...
"माई...! ए माई, उठऽ बिहान हो गइल!"

माई कुछउ ना बोलली! उ फेरु आवाज दिहले...
" ए माई, उठऽ ना... आजु तिन गो कामरा मिलल बा त आराम से सुतल बाड़ु! कहुवीं नु कि एगो अउरी कामरा ले ल.. ठंढी ना लागी! "
माई फेरु कुछउ ना बोलली!
नटवर आगे बढ़ के माई के जगावे खातिर कामरा खिंचले! " माई उठऽ... "

एगो कामरा उनका हाथ में आ गइल! माई ना हिलली! उ घबरा के फेरु ओढ़ना जोर से पकड़ के खिंच ले... "ए माई.. उठऽ ना.. "
पुरा ओढ़ना उनका हाथ में आ गइल! माई ना हिलली! अब जवन सोझा रहे उ देख के नटवर अवाक रह गइले! माई के दाँत पर दाँत कसाइल रहे, आँख बन्द रहे, हाथ खुलल रहे, नाक से एक दू बूंद खून चु के जम गइल रहे! नटवर के माई ठंढ़ी से आपन लड़ाई हार गइल रहली!
नटवर अब दहाड़ मार मार के माई माई कह के रोवे लगले!उनका लरिकाईं से लेके अभिन तक के सब बात इयाद परे लागल! जिनगी में जवन मिलल माई के आशीर्वाद से मिलल! बाकिर अफसोस....!
कुछ देर बाद नटवर काँच बाँस से बनल पचाठी पर माई के लाश खातिर पुअरा बिछावत रहले! काश.. इ पुअरा एक दिन पहिले उ संगमरमर के पत्थर पर बिछा देले रहते त एतना जल्दी पचाठी पर ना बिछावे के पड़ीत!

✍️: रामसागर सिंह
ग्राम: कोदई, पचरुखी, सिवान (बिहार)
M: 8156077577

लरिकाईं में हमहुँ एगो, रोबोट बनवले रहनी,
ओकरे आगे हम अपना के, छोट बनवले रहनी।
आठ पहर उ राखत रहे, अपना आँखि के सोझा,
हरदम कोरा टांगि के राखे, ना बुझलस उ बोझा।

ममता छोह लुटावे अउरी, पुचकारे दुलरावे,
जब हमरा के भूख लागे, उ आपन दूध पियावे।
हरदम अपना कोरा ले के, संघहि अपना राखे,
उ हमरा कुशलाई खातिर, दर दर भारा भाखे।

बिनु कहले सब जाने बुझे, हमरा देह के भाषा,
बिनु स्वार्थ सब करे कवनो ना रखलस उ आशा।
अनजाने में कबहुँ जे बिस्तर पर झाड़ा फिरीं,
रोबोट नु रहे! तब उ दउरल आवे हमरा भिरीं।

धोवे पोंछे नहवावे आ देहि में तेल लगावे
मिसे गोड़ आ देह दबावे हमरो थाक भगावें।
आँखि में हमरा काजर करें माथे लगावे टीका,
टोना नजर ना लागे देवे ओकर इहे तरीका।

रखले रहे मामा एगो आसमान के जाके,
दुध आ भात खियावत रहे चंदा रोज बोला के।
अपने गोदी राखे हमके अपने पास सुतावे,
आजा नींनिया रानी कहके लोरी रोज सुनावें।

आंचर ओकर ओढ़ना हमरो आंचर रहे बिछवना,
सोंचिले के ओइसन सुख अब मिली जगहा कवना?
कवनो बात के फिकिर ना रहे, सब कुछ उहे करें,
नेटा पोंटा गुह मुत से ,ओकर जीव ना भरे।

गंड़तर भगई फिंचत फिंचत कहियो ना अगुताइल,
जब जब हमरा ओरी देखलस खुश भइल मुस्काइल।
खुशी के ओकरा पार ना रहे जब हमरा के देखे,
रामसागर कलम सियाही से हम लिखीं कवना लेखे।

कुछ बड़ हम भइनी हमहुं कइनी कुछ चतुराई,
खुश होई के हमहीं ओकर नाम ध दिहनी माई!
✍🏻: Ramsagar Singh
M: 8156077577

मिलल जिनगी त रिश्ता हजार बनल,
हजारों मे एक माई के प्यार बनल।
मस्जिद से मंदिर त देव भी हजार हो,
सबसे बड़ जिनगी मे माई के प्यार हो।

जेकर अँगुरी पकड़ के देखनी जहान हो,
मतलबी दुनिया मे माई तुही महान हो।
जिनगी मे जेकरा ना मिलल प्यार माई के,
बहुते अभागा माने ई संसार मे आई के।

दिल के शीशमहल मे छुपा के राखी माई हो,
बहुते सुकुन मिले ओढ़ी तोहार अंचरा माई हो।
फरेबी बनावटी दुनिया मे ममता के मूरत तू,
बहन-भाई-भाई मे प्यार रहेलु जोड़त तू।

नाही पाई जगह दुनिया मे केहू माई के,
नमन करें "रघुआ" एह दुनिया के सब माई के।
नेकी ना दिलाई माई केहू कतनो महान हो,
जुग कवनो आई माई रहीहे महान हो...

माई रहीहे महान हो।
✍️राघवेंद्र प्रकाश 'रघु'✍️
ब्रह्मपुर धाम, बक्सर (बिहार)

दुनिया बात बतावत बाटे,
आपन लोग हरावत बाटे।
मान, जान अउरी गरिमा के,
तफरी खूब उड़ावत बाटे।।

​जेकरा के आपन कहनी हम,
विष के बीज जमावत बाटे।
हँसत देख के दुनिया सगरी,
भीतर-भीतर गावत बाटे।।

​साँच कहल अब मुश्किल भइल,
झूठ के शोर सुनावत बाटे।
नेह-छोह के धागा कच्चा,
लालच आज तुरावत बाटे।।

​काँटा बन के रस्ता रोके,
जे राही के भावत बाटे।
भरम के ऊँच महल गढ़ के,
सपना के भरमावत बाटे।

बानी बड़ा मजबुरी मे
का लिखीं भोजपुरी मे।
सोहर समाज से दुर भइल
निर्गुन के दोहन भरपुर भइल

आपन रिवाज के बियाहे के गीत
डीजे के आगे चकनाचुर भइल।
बिना गीतन अब निक ना लागे
रोपनी- सोहनी के मजदुरी मे।

बानी बड़ा मजबुरी मे
का लिखीं भोजपुरी मे।
गजब के पुरानका रीत रहे
हर परब-तेवहार के गीत रहे

छठी माई से काली माई तक
आपन एगो संगीत रहे।
लोकगीत अब नाच रहल बा
अश्लीलता के अँगुरी मे।

बानी बड़ा मजबुरी मे
का लिखीं भोजपुरी मे।
बितल सावन ना कजरी आइल
मास चइत ना चइता सुनाइल

कुहके जियरा बारहमाँसा के बिना
पुरबी जग से भाग पराइल।
अल्हा- बिरहा लउक रहल बा
हजारों कोस के दुरी मे।

बानी बड़ा मजबुरी मे
का लिखीं भोजपुरी मे।

तुम मुझे याद भी करते हो क्या?
अब बता दो प्यार करते हो क्या?
सामने मैं हूँ और ये हिचकियाँ भी,
कहीं और फ़रियाद करते हो क्या?

ना दूर रहेनी,ना पास रहेनी
बन के केहू के आस रहेनी
कहियों ख़ुश होखेम त लिखेम
कि काहे एतना उदास रहेनी

थोड़ी हया तो होनी चाहिए आँखों में
थोड़ी तमीज़ तो होनी चाहिए बातों में
रुतबा किसका कितना है क्या करना
रास्ते तो गीले हो ही जाते हैं बरसातों में

थोड़ा लहज़ा संभाला करें तो अच्छा है
नफ़रत में घर तक जल जाते हैं बातों में
फ़ुर्सत किसको है किसी से मुलाक़ात की
यहां चेहरे तक पहचाने जाते हैं हालातों में

थोड़ा नरमी रखा करिए 'बिना रंग बदले
फिर देखिए लोग भीग जाते हैं जज़्बातों में

कहाँ केहु दिल में उपकार राखत बा
मतलब से ख़ाली सरोकार राखत बा
बस गरज ले बाटे सब रिश्ता - नाता
बेगरज कहा कौनो दरकार राखत बा

जेकरा के लोग समझत बा आपन
पीठ पीछे उहे तलवार राखत बा
दोसरा के ख़ुशी अब कहा सोहाता
मन में लोग इरखा हज़ार राखत बा

लोग अन्दर से कुछू बा बाहर से कुछू
हर आदमी कइ गो किरदार राखत बा.
आ जेकरा के ईश्वर देत बाडेन खूब
उहे औरी लूटे के बिचार राखत बा.

अपने लोग अब पराया हो गइल।
गांव से बरगद के सफाया हो गइल।
मेल-जोल अब धतूरा सन जहरीला भइल,
आम-अमरुद के स्वाद पुराना हो गइल।

चिउंटी के चीनी खियावे वाला लोग कहाँ गइल,
अब त आदमी, आदमी के ही निशाना हो गइल।
डीह बाबा के चउरा पर बैठकी के रिवाज हेराइल,
जब से हर आँगन मे मोबाईल के जमाना हो गइल.

सच कहे वाला के अब के सुनत बा एहिजा,
झूठ के बाजीगर ही सबसे सेयाना हो गइल.
खेत खलिहान छोड़ शहर भागे लागल सब,
माटी से रिश्ता भी अब बेगाना हो गइल.

के सुनी अब झूमर, झारी, चइता, बिरहा, कजरी,
“भावुक” के बोली अब बस फसाना हो गइल।

सब एहीजे मिली
---------------------
मोर बाल बच्चा खूबे सुनर,
ई घमंड रूप के पाली मत।

दोसरा के करिया नकभेभर,
मीन मेख अनका काढ़ी मत।।
सुनरको जाइ बउरको जाइ,
बिधना के लेख बुझाई कब।

धरम करम तनी राखी निमन,
ताकि गईला पर गुन गाई सब।।
रहत होखऽ तू महल अटारी,
चाहें टूटल झोपड़ पट्टी लघु।

आइल बा जे ऊ जइबे करी,
के विधि लेखा के टारी 'रघु'।।
रात अन्हरिया भा अंजोरिया,
हो बसंत या दिन पानी बुनी।

छोड़ देह चल जाइ बहरिया,
अमर आत्मा के सब कहानी सुनी।।
छोड़ऽ घमंड रूपया पइसा के,
सोना नियन महल अटारी के।

ए मनई रहऽ बना व्यवहार के,
ना त उड़त परान देह जारी के।।
बाउर दिन भी बनत मिली,
बनल दिन होत बाउर मिली।

जइसन करबऽ ओइसन मिली,
सरग नरक सब एहीजे मिली।।
✍️राघवेंद्र प्रकाश 'रघु'
ब्रह्मपुर, बक्सर (बिहार)

​आजकल के जमाना देख के मन भकुआ जाला। शौक के कवनो ओर-छोर नइखे रह गइल। जहाँ पहिले दुआर पर गाय-गोरु के रँभाईल सुभ मानल जात रहे, ओहिजा अब कुकुर पोसल जा रहल बा। पहिले स्वागत में कुछु लिखात रहें मेन दरवाजा के आसपास अब कुकुर से बचे के चेतावनी लिखल लउकत बा। आ तनी ओकर तवज्जो देखल जाव... कुकुर न भइल, कवनो वीआईपी (VIP) मेहमान भइल!
​हमार पड़ोसी भइया जी, जे हर बात में 'राजधानी' के रट लगावेले, ऊहो एगो करिया कुकुर ले अइलन। दाम पूछनी त अइसन गरबइलन जइसे कवनो मंगल ग्रह के प्राणी के सौदा क के आइल होखस— "अरे का बताई भयवा, 12000 के त खाली बच्चा रहे, 14000 त ओकरा दवाई-बिरोई में लाग गइल। खास पटना के शौकीन घर के नसल (Breed) ह!"
​हमहूँ तनी 'तेल' लगावे खातिर बिना मन के कह देनी— "वाह भइया! मान गइनी। कुकुर त कुकुर बा, एकदम कुचु-कुचु करिया! अइसन स्मार्ट लुक त पूरा जवार में केहु के कुकुर के नइखे। एकदम लाजवाब बा राउर ई कुकुर.. राउर पसंद के त कवनो जवाबे नइखे!"
​एतना सुनत कहीं कि भइया जी के 'कॉन्फिडेंस' सातवाँ आसमान चीर दिहलस। अब ऊ अंग्रेजी आ हिंदी के खिचड़ी (हिंग्लिश) बना के कुकुर के खान-पान से लेके ओकरा पखाना तक के 'महिमा मंडन' शुरू कर देहलन। हम बेचारा, भोजपुरी देहाती मन, जम्हाई लेत-लेत उनकर गप लपेटे लगनी जैसे तिलंगी उडावत घरी कटला के बाद लटाई में धागा लपेटत होखी... एकदम मुँह चोथा लेखा बनवले.. झवाइल मन से!

​मने-मन सोचत रही कि— भाला होखे ई भइया जी के, जे खुद दिन भर कवनो न कवनो नशा में चूर रहेले, माई-बाबू के एकलौता 'कुल-दीपक' (वारिस) हउअन, आ जिनका घर के शाकाहारी चूल्हा पर कसहूँ दाल-भात चड़त बा... ऊ आज कुकुर के 'डाइट' (Diet) पर लेक्चर दे रहल बाड़न!
​हँसी त तब रोके ना रुकल जब ऊ कहलन— "देखऽ भाई, एकरा के हम रोज केला, सेब आ गाय के पियोर दूध-भात खियाइला। एकदम सात्विक भोजन! रोज मतलब प्रतिदिन, एको दिन नागा ना!"
​हमरा के कृषि के पढ़ाई में 'एनिमल हसबेंडरी' (पशुपालन) वाला मास्टर साहब पढ़ावत रहन कि कुकुर मूल रूप से मांसाहारी जीव ह। आ हमहूँ जवार में देखले बानी कि कइसन करिया-उजर कुकुर अंडा-मांस देखला पर गप-गप लेल लपकावेले। अब भइया जी के ई 'शाकाहारी कुकुर' कवन नया अवतार रहे, ई त भगवानें जानस!
​एतने में ऊ 'करिया कुकुर' अपना मालिक के संगे प्रस्थान करे लागल। जाते-जाते ऊ हमरा गली में 'लिक्विड फॉर्म' में पातर पोट्टी (छेरत) करत गइल। जइसे कहत होखे— "बड़ाई त खूब कइलऽ, अब ई प्रसाद भोगऽ!"

​हम चैन के साँस लेबे ही वाला रहनी कि नजर पड़ल— हमरा घर के ठीक सोझै, दरवाजा के मुँह पर ऊ कुकुर लिक्विड वाला 'सिंगार' क के गइल रहे। हम मन ही मन कुकुर के पगहा धइले भइया जी के 'गरियावत' गली के बाल्टी-पानी ले के साफ करे लगनी कि बिहान कवनो मान-जान के गोड़ ओकरा में पवितर मत हो जाव।
​अब जा तानी देह-हाथ धोए... काहें कि जब गाय-गोरु पोसे वाला खानदान कुकुर के डाइट चार्ट बनावे आ ओकर बखान लागे करें नू , त आदमी के भकुआइल तय बा! जइसे हमरा दिने में जोन्हि लउकत रहें।
✍️राघवेंद्र प्रकाश 'रघु'
ब्रह्मपुर, बक्सर (बिहार)

याद त अइबे करी घरी-घरी,
रिश्ता उ अलगे उफान पर रहल।
नज़र लागल कवने मुदइया के रामा,
बहल नयनन नीर जइसे बरखा रहल।

पिरितिया हम तोहसे लगवले रहीं,
सखी-सहेली में चर्चा कइले रहीं।
बनबऽ तुही मोर राजा ए 'रघु',
धीरे से काने माई के बतवले रहीं।

करे के रहल लमहर बात तोहसे,
उ बात अब तक अधूरा रह गइल।
नादान मन सोचले रहल बनी कहानी,
उ बतिया भी आज अधूरा रह गइल।

हाथ रखऽ अपना करेजा पर कबो,
सोचिहऽ कि केकरा में गलती रहल।
सोचिहऽ एहु बात के ए राजा कबो,
काहे हमनी के पेयार अधूरा रह गइल।

एतना पेयार तोहसे हम कइले रहीं,
कबो दोसरा के ना हम सोचले रहीं।
सफर जिनगी कतहीं मिलिहऽ अगर,
देख के अनदेखा ना करिहऽ कहीं।

बात मनले जे रहतऽ हमरों कभी,
कटत जिनगी राजा तोहरे संगे कहीं।
जहाँ रहऽ आबाद रहऽ तू हसीं ख़ुशी,
टूटल करेजवा से भी हरदम दुआ रही।

✍️राघवेंद्र प्रकाश 'रघु'
ब्रह्मपुर, बक्सर (बिहार )

हमार शान ह
हमार पहचान ह भोजपुरी,
हमार मतारी ह
हमार जान ह भोजपुरी I

इहे ह खेत, इहे खरिहान ह
इहे ह सोखा, इहे सिवान ह,
हमार सुरुज ह
हमार चान ह भोजपुरी I

बचपन बुढ़ापा ह, ह इहे जवानी
चूल्हा के आगि ह, अदहन के पानी,
हमार साँझ ह
हमार बिहान ह भोजपुरी I

ओढिला इहे, इहे बिछाइला
कूटिला इहे, इहे पिसाइला,
हमार चाउर ह
हमार पिसान ह भोजपुरी I

इहे ह धरन, इहे ह छानी
हमरा पसीना के इहे कहानी,
हमार तीर ह
हमार कमान ह भोजपुरी I

कजरी ह बिरहा ह, इहे ह फ़ाग
इहे कबीरा ह, इहे ह घाघ,
हमार बिरासत ह
हमार ईमान ह भोजपुरी I

फेरु बयरिया डोले लागी !
फेरु भले अधियार गइल बा,
दुर्वह मन के भार भइल बा ;
जँहवाँ ले लउकत बाटे

करिया सगरे संसार भइल बा।
लाल किरिनिया झाँकी, कलिया-
फेरु नजरिया खोले लागी !
फेरु बयरिया डोले लागी !!

हर चेतन चुप-चाप भइल बा,
नीरवता के शाप भइल बा,
मन में कतनो पीर रहे,
ओठनि के खोलल पाप भइल बा।

फेरु चिरइया चहकी, भोरे-
फेरु कोयलिया बोले लागी !
फेरु बयरिया डोले लागी !!

अनपढ़ जाहिल सरकार हो,
जिनिगिया बेकार मोर कइले
जिनगी कइले बेजार हो
जिनिगिया बेकार मोर कइले

माई के गहना आ बाबू के खेतवा,
बेचि के पढ़ल बा बेचारा ई बेटवा।
पेपर लीक कइले बार-बार हो,
जिनिगिया बेकार मोर कइले

अनपढ़ जाहिल सरकार हो…
खेतवा में सूखल बा अन्न के ओरी,
फाँसी लगावेला किसान ओही डोरी।
रोअत बा सगरो परिवार हो,

जिनिगिया बेकार मोर कइले
अनपढ़ जाहिल सरकार हो..
नमक आ तेल भइल सोना के भाव हो,
मरत बा भूखल अब सगरो ई गाँव हो।

नून-रोटी भइल दुश्वार हो,
जिनिगिया बेकार मोर कइले
अनपढ़ जाहिल सरकार हो…
बिना घूस फाइल अब एको डेग ना डोले,

आन्हर ई तंत्र अब केकरा के बोले।
चहुँओर मचल लूटमार हो,
जिनिगिया बेकार मोर कइले
अनपढ़ जाहिल सरकार हो…

हाथ के छाला आ गोड़ के बेवायी,
महंगाई के मार में मिलल ना दवाई।
मरले बा कुरु कुरु मार हो,
जिनिगिया बेकार मोर कइले

अनपढ़ जाहिल सरकार हो…
डिगरी के कागज अब रद्दी के भाव बा,
पढल-लिखल लइकन के मनवा में घाव बा।
बेचे सभे पकौड़ा आ अचार हो,

जिनिगिया बेकार मोर कइले
अनपढ़ जाहिल सरकार हो…
भाषण में बाटे सभे स्वर्ग देखावत,
बाकी हकीकत में नरक खियावत।

झूठ के बा सगरो परचार हो,
जिनिगिया बेकार मोर कइले
अनपढ़ जाहिल सरकार हो…
कलम अब तिवारी 'विनायक' के जागल,

देखि के ई तेवर भ्रष्टाचारी बाड़े भागल।
मचल चहुओर हाहाकार हो,
जिनिगिया बेकार मोर कइले
अनपढ़ जाहिल सरकार हो…

बाबा साहेब के तू करिहऽ, गुणगान बबुआ।
जे बनावल एही देश के, संविधान बबुआ।
बिखरल रहे समाज घिनौना, छुआछूत की आन्ही में।
जाति-व्यवस्था जहर घोरि दिहले रहे पानी-पानी में।

ऐही सभ्य समाज में मानव से पशुवत व्यवहार भइल।
अत्याचार बढ़ल एतना की मानवता भी हार गइल।
इहवां समझे ना केहू हमनी के, इंसान बबुआ।
बाबा साहेब के तू करिहऽ, गुणगान बबुआ।

जे हमनी के आरक्षण के, फौलादी हथियार दिहल।
शक्तिशाली संविधान के , जे सुंदर उपहार दिहल।
जे समाज खातिर जीवनभर, दुनिया से संघर्ष कइल।
उनका चलते आज हई सपना, सगरो साकार भइल।

दिहल उनकर हउवे होठे पर मुस्कान बबुआ।
बाबा साहेब के तू कइ लऽ, गुणगान बबुआ।
सत्ता शिक्षा पर समान अधिकार, दियावल उनकर हऽ।
दलित और शोषित गरदन में, हार दियावल उनकर हऽ।

जे आवाज बनल हमनी के, सड़क से ले के संसद तक,
हमरा तहरा खातिर ई संसार, दियावल उनकर हऽ।
जेकरा आगे शीश झुकावे ला, जहान बबुआ।
बाबा साहेब के तू करिहऽ, गुणगान बबुआ।

धूप चटके त अमृत के निसानी चाहीं,
सोन्ह घइला के ओही में पानी चाहीं।
​जवन मिसरी घोल देला मन के भीतर,
ओही सतुआ के सानल कहानी चाहीं।

​मेटावे घाम के तीताई जलन देहि से,
पिपरा के छाँव अस एगो जवानी चाहीं।
​चना,जव मकई के सुनर महक आवेला
ओपर नून,मिर्चा टिकोरा छानी चाहीं।

मिटे कंठ के तरास जव-बूट के सतुआ से,
अपना गाँव के किसान के मेहरबानी चाहीं।
​जेकरा पवला से पुरखा के याद आवेला
'बिनायक' आज ओइसन रूहानी चाहीं।

गणेश नाथ तिवारी"विनायक"

झूठ बोलल आजकल शान में गिनाता
अब त लेड के पेड़ भी परधान में गिनाता
हो गईल ईमानदारी घर-घर में मूसमात
अब दर्द के दवा भी एहसान में गिनाता

भाषण जे देत बाड़े टीवी पर दिन-रात
टाई-सूट वाला भी किसान में गिनाता
भाई के हक़ मार के जे बढ़ गईल आगे
आज उहो लोग साहिबे ईमान में गिनाता

अब हकीकत बा कम देखावा बा ज़्यादा
सवा मीटर कपड़ा भी थान में गिनाता
छूट गईल गाँव में ही आपन पुश्तैनी घर
शहर के 25 गज के फ्लैट मकान में गिनाता

भीड़ देखि के मदद के गुहार मत लगाईं
जे भीड़ में बा हिन्दू-मुसलमान में गिनाता
नूरैन! जे ग़ैर रहे उ लोग हो भइल आपन
जे आपन रहे, उ अब आन में गिनाता

याद त अइबे करी घरी-घरी,
रिश्ता उ अलगे उफान पर रहल।
नज़र लागल कवने मुदइया के रामा,
बहल नयनन नीर जइसे बरखा रहल।

पिरितिया हम तोहसे लगवले रहीं,
सखी-सहेली में चर्चा कइले रहीं।
बनबऽ तुही मोर राजा ए 'रघु',
धीरे से काने माई के बतवले रहीं।

करे के रहल लमहर बात तोहसे,
उ बात अब तक अधूरा रह गइल।
नादान मन सोचले रहल बनी कहानी,
उ बतिया भी आज अधूरा रह गइल।

हाथ रखऽ अपना करेजा पर कबो,
सोचिहऽ कि केकरा में गलती रहल।
सोचिहऽ एहु बात के ए राजा कबो,
काहे हमनी के पेयार अधूरा रह गइल।

एतना पेयार तोहसे हम कइले रहीं,
कबो दोसरा के ना हम सोचले रहीं।
सफर जिनगी कतहीं मिलिहऽ अगर,
देख के अनदेखा ना करिहऽ कहीं।

बात मनले जे रहतऽ हमरों कभी,
कटत जिनगी राजा तोहरे संगे कहीं।
जहाँ रहऽ आबाद रहऽ तू हसीं ख़ुशी,
टूटल करेजवा से भी हरदम दुआ रही।

माथे पर गमछा सजावल गइल बा,
जइसे सवांग के जगावल गइल बा।
​जेठ के दुपहरी में लू से देहि झुलसे,
तs माथ के ओहार बनावल गइल बा।

​उठे जब बबूला के बेजोड़ झोंका,
त मुँह के पट्टी से बचावल गइल बा।
​कबो बीँड़ बन के ई माथा पे सोहे,
तs माथा पs बोझा उठावल गइल बा।

​खेतवा में मोटरी में सतुआ बँधाइल,
त फाँस के झोरी बनावल गइल बा।
​चले जब ना पुरवा तs बनि के बेना,
कि खुद के हवा ई खियावल गइल बा।

​कुँआ के जगत पे जो लोटा ना डूबे,
त डोरी के कामो चलावल गइल बा।
​अमवा के टिकोरा जो गिरल बग़इचा,
त खोंइछा बना के उठावल गइल बा।

​सहर के उ टाई के चमक बा फीका,
कि इज्जत के गाँठ लगावल गइल बा।
​'विनायक' ई माटी के अइसन महक बा,
जेके रोम-रोम में बसावल गइल बा।

आव एगो नया बस्ती बसावल जाव,
सुनर एगो नया दुनिया बनावल जाव।
मजहब के कवनो देवाल ना रही उहवा,
मानवता के एगो नया घर बनावल जाव।

जातियन के कुल करम भरम तूर के,
इसांनियत के बस्ती सजावल जाव।
देहला के औकात जदि बा हमनी के तऽ,
चलऽ कुछ लो पर खुशी लुटावल जाव ।

प्यार मोहब्बत से तs सभे खुस रहेला,
दुनिया से नफरत के दूर भगावल जाव।
भोजपुरिया लो तऽ एक दूसरे में भिड़ल बा लो,
चली मिलजुल भोजपुरी के मान बढ़ावल जाव।

गोली बम बारुद,विरोध में फिरत बा सब लो
चलs 'गणेश'बिना एकरा जहां बनावल जाव।

राम जी के भइले जनमवा हो रामा
दशरथ के भवनवा
पंडितजी वेद मंत्र ऊँचारे
सखी सहेली फूल माला सवांरे

चइत के शुभ महिनवा हो रामा
दशरथ के भवनवा
चारो भइया के चरण जब आइल
अवध भूमि इतिहास में लिखाइल

देखलस पूरा जमानवा हो रामा
दसरथ के भवनवा
पावन धरती अयोध्या नगरिया
रामजी के बनल भव्य मंदिरिया

खुशियाँ मनवेला जहाँनवा हो रामा
दशरथ के भवनवा
रघुवर के आजु भइल पगबन्दन
पूजा गणेश कइले अभिनंदन

दियना जरवले अंगनवा हो रामा
दशरथ के भवनवा
राम जी के भइले जनमवा हो रामा
दशरथ के भवनवा

चहकेला घरवा दुआरवा हो रामा
अइलें सजनवाँ
रचि रचि धनिया भोज बनवली
सोने के थाल में जेवना सजवली

जेवेलें बारहों बिजनवाँ हो रामा
अइलें सजनवाँ
बाल गोपाल संघे फुलवो फुलाइल
पेन्ही के पियारिया मन अगराइल

निरखे ले सइंया सेजरिया हो रामा
अइलें सजनवाँ
पोरे पोरे प्यार सजन बरिसावेलें
ललका गुलाब मोरे जुड़ा में लगावेलें

मारेले तिरछी नजरिया हो रामा
अइलें सजनवाँ
चहकेला घरवा दुआरवा हो रामा
अइलें सजनवाँ

साँझीये से बिहँसे ला मनवा हो रामा,
बैरी पलँगवा
आधी रतिया के निनिया ना आवे हो रामा
बैरी पलँगवा

हहरा के बहे जब पछुआ के झोंका,
मोजरि के महँक से हिया भइल चोखा
काँट लेखा लागेला सेजरिया हो रामा
बैरी पलँगवा

साँझीये से बिहँसे ला मनवा हो रामा,
बैरी पलँगवा
अँखिया के लोरवा से लिखतानी पाती
धड़केला की ना तोहार हिया ए सँघाती

अइबs कबले हमरो पजरिया हो रामा
बैरी पलँगवा
साँझीये से बिहँसे ला मनवा हो रामा,
बैरी पलँगवा

सोरहो सिंगरवा मोर भइल बा बटोही
परदेस जाके काहे भइल तू निर्मोही
फड़फड़ाता मोर कोमल करेजवा हो रामा
बैरी पलँगवा

साँझीये से बिहँसे ला मनवा हो रामा,
बैरी पलँगवा

हहरा के बहेला चइत में बयरिया
कवना कोना में लुकइले सांवरिया
बिहँसे ला हमरो बदनवा
परनवा नाही अइले।

​भक-भक भभकेला पछुआ के झोंका
हियरा के बुझे वाला आइल नाही सोखा
बितियो गइल बा फगुनवा
परनवा नाही अइले।

करवट बदलत बिति जाला मोर रतिया
मति कादो मरले बिया कवनो सवतिया
बउराइल बाटे मोर मनवा
परनवा नाही अइले।

रोइ-रोइ हियरा के पनिया सुखावल
कौने जनम के ई बदरवा बा छावल
सकुचात बाटे अब दरपनवा
परनवा नाही अइले।

हारि पाछि के अब त 'राम' गोहराईं
बिरहा के पीर के कवन बा दवाईं
जुड़इले ना विनायक ई नयनवा
परनवा नाही अइले।

कुहुके करेजवा में हमरो करेजवा
एजवा मारिये दिहलs
देबे के परित दहेजवा
एजवा ……..

कवन कसूर हमार तनिका बतइति
एगो रहे सोना एगो चानियो अपनइति
परी गइनी फेरा में पावे खातिर पुतवा
एजवा……..

केतना हम सोंचनी आ केतना भोकरनी
होत अन्याय पर ना कबहु चोकरनी
काहे के त्यगनी रउआ, कोखि के करेजवा
एजवा…….

अइती अँगनवा त गुलजार करिती
बेटा अउरी बेटी के भेदवा बतइति
सगरो जहान के ई दिहत्ती सनेसवा
एजवा……..

कुहुके करेजवा में हमरो करेजवा
एजवा मारिये दिहलs
देबे के परित दहेजवा
एजवा ……..

कुल्हत मुसमात महतारी के
समाज के अपना नारी के
केकरा चिंता बाटे ए भइया
असल मे एगो बिहारी के

आवता जे भी खाता उहे
बाड़ेन असली दाता उहे
का कहीं सरकार के जी
सवत आपन बुझाता उहे

मजदुर हमके मानल जाता
भावना रोज खानल जाता
कहीं बोली कहीं भाषा पर
लाठी बेर-बेर तानल जाता

बॉम्बे गुजरात ठेलल जाई
पक्ष-विपक्ष खेलल जाई
धरम के ख़ास मुद्दा बनाके
फेरू बिहार मे हेलल जाई

आए दिन मिलता ऑफ़र
अब छठ मे रेल गाड़ी के
केकरा चिंता बाटे ए भइया
असल मे एगो बिहारी के

केहू दिन केहू रात के नेता
ना मिले रोटी भात के नेता
गली गली अब घूमतारान
देखीं ना रउवा जात के नेता

अपराध के चले जुग जमाना
डरल बाटे व्यापारी घारना
हिम्मत बाटे त पूछी ना जाके
सुतल बा कहँवा पुलिस थाना

आँगन राउर दुवार मे का बा
गाँव राउर बाजार मे का बा
कुछ दिन मे कहिअन नेहा
यूपी मे का बिहार मे का बा

कहे लोग बिहार ना सुधरी
बुरबक आ लाचार ना सुधरी
कइसे रोजी-रोजगार मिली
आदत जब हमार ना सुधरी

पाँच किलो अनाज अउरी
दू चार सौ रोज डेहारी के
केकरा चिंता बाटे ए भइया
असल मे आज बिहारी के

ई बात हवा के खल रहल बा,
कि काहे दीया जल रहल बा।
रात अँहरिया साज़िश कईलस,
तबहूँ सूरज निकल रहल बा।

दुश्मन से हम बचत रह गइनी,
अपनहीं लोगवा छल रहल बा।
गिरगिट त बदनाम बा खाली,
आदमी ज़्यादा बदल रहल बा।

दोष हम काहे काँटा के दीं,
फूल ही पाँव में हल रहल बा।
अब अपने घर के बात “नूरैन”,
दोसरा से पता चल रहल बा।

चईत -चईत लेखा, बुझात कहां बा,
बनिहार से कटनी, कटात कहां बा।
शहरन में लोगवा लहर लूटत बा,
गांवन में अब केहू जात कहां बा।

ए. सी. किनाइल त देसी भुलाइल,
खुला हवा अब केहू खात कहां बा।
चईत-चईत लेखा, बुझात कहां बा।
कुदारिन से कोड़ार कोड़ात नइखे,

खेत में पानी करहा मोड़ात नइखे।
ट्रैक्टर - ट्रॉली पर बोझा लादाता,
बैलन पर लादना ढोआत कहां बा।
चईत - चईत लेखा, बुझात कहां बा।

हरवाहन के हाथे खेत जोतात नइखे,
टांड़ के चलाके बिया बोआत नइखे।
खटे वाला मजदूरा, मिलत नइखन,
मार मुंअरिन तीसी पिटात कहां बा।

चईत - चईत लेखा, बुझात कहां बा।
हार्वेस्टर कटर से फसल कटात बा,
बड़ भूंसा के टाल गंजात कहां बा।
खरिहनियो अब त लिपातो नइखे,

अनाजन के ढेरी तउलात कहां बा।
चईत- चईत लेखा, बुझात कहां बा।
ओखर - मुसर, ढेकी उफर परल,
जांत में सतुआ पिसात कहां बा।

सतुआनो के दिनवा, चटक चटनी,
सतुअवा जवरे जी भेंटात कहां बा।
चईत- चईत लेखा, बुझात कहां बा।
चर-चबेनी, मोहरइया मिलत नइखे,