जाड़ से एतना हाड़ कपवलु, दम तू कईलु नाकी-
ए शीतलहरी काकी
रखलु ना करम कवनो बाकी-ए शीतलहरी काकी
करी कोई ड्यूटी कइसे, जाई अपना काम-धन्धा।
धुन्ध से रोड पर सूझत नइखे, भईल आदमी अन्धा।
मांगत बा सभे पनाह अब, देख के तोहर बेबाकी-
ए शीतलहरी काकी …..
तापमान दिन पर दिन गिरे, भईल पांच से नीचे।
अब त ई समझे ना आवे, के नहाव के फिंचे।
पाला गोड़ नाहीं गरमाला, केतनो कम्बल में माकी-
ए शीतलहरी काकी …..
राहत के ना सांस मिलेला, बीते दिन अगिया तापत।
घाम के दर्शन होते नइखे, थर थर बा सब कांपत।
ओस में सुरुजदेव लुकाके, मारेलन अब फाकी-
ए शीतलहरी काकी …..