राम जी के भइले जनमवा हो रामा
दशरथ के भवनवा
पंडितजी वेद मंत्र ऊँचारे
सखी सहेली फूल माला सवांरे
चइत के शुभ महिनवा हो रामा
दशरथ के भवनवा
चारो भइया के चरण जब आइल
अवध भूमि इतिहास में लिखाइल
देखलस पूरा जमानवा हो रामा
दसरथ के भवनवा
पावन धरती अयोध्या नगरिया
रामजी के बनल भव्य मंदिरिया
खुशियाँ मनवेला जहाँनवा हो रामा
दशरथ के भवनवा
रघुवर के आजु भइल पगबन्दन
पूजा गणेश कइले अभिनंदन
दियना जरवले अंगनवा हो रामा
दशरथ के भवनवा
राम जी के भइले जनमवा हो रामा
दशरथ के भवनवा